ВМРО-ДПМНЕ денеска обвини дека македонското правосудство функционира со двојни стандарди, оценувајќи дека граѓаните немаат еднаков третман пред законот.
Во партиското соопштение се наведува дека за помали кривични дела биле изрекувани високи затворски казни, посочувајќи примери во кои за физичка пресметка со кубење коса била изречена казна затвор од четири години, а за кражба на 150 ќебапи три години.
Истовремено, ВМРО-ДПМНЕ тврди дека кај случаи со тешки последици, во кои, според нив, постојат сомневања за поврзаност со лица од или блиски до СДСМ и ДУИ, одговорноста изостанува.
Како примери ги посочуваат автобуската несреќа кај Ласкарци, во која загинаа 16 лица, пожарот во модуларната болница во Тетово со 14 жртви, како и случајот „Мазут“, кој, според партијата, е тежок 167 милиони евра.
Од ВМРО-ДПМНЕ оценуваат дека граѓаните со години чекаат разрешница за овие предмети и утврдување на евентуалната одговорност на сите инволвирани лица.
