Генералниот секретар на СДСМ, Александар Саша Димитријевиќ, побара Јавното обвинителство да постапи по случајот со „Алта банка“, оценувајќи дека, според него, во јавноста се појавиле доволно информации за отворање истрага.
Димитријевиќ тврди дека изјавите поврзани со носењето на одлуката за влез на „Алта банка“ во Македонија отвораат сериозни прашања за одговорноста на носителите на одлуките.
„Имаме признание дека одлуката за ‘Алта банка’ ја донел премиерот Христијан Мицкоски. СДСМ уште пред 11 месеци предупредуваше да не се дозволи влезот на банката, но Владата сепак ја одобри“, изјави Димитријевиќ.
Тој тврди дека банката влегла на македонскиот пазар и покрај, како што рече, реакциите од Европската централна банка, сомнежите околу капиталот и други околности кои, според него, требало дополнително да бидат испитани.
Генералниот секретар на СДСМ упати повик до јавниот обвинител Ненад Савески да постапува, како што рече, исклучиво согласно законските надлежности.
Според него, Обвинителството треба да отвори истрага и да ја утврди евентуалната одговорност на сите лица кои учествувале во процесот на одлучување за влезот на „Алта банка“ во Македонија.
Од СДСМ бараат истрагата да ги опфати сите инволвирани институции и функционери, додека од надлежните институции засега нема официјална реакција на овие обвинувања.
