СДСМ обвини дека лидерот на ЗНАМ, Максим Димитриевски, со своите настапи му создава алиби на премиерот Христијан Мицкоски за распишување предвремени парламентарни избори.
Од партијата тврдат дека актуелната тема околу правосудниот испит намерно се наметнува во јавноста за да се создаде впечаток за судир и тензии во владејачката коалиција, а со тоа да се отвори простор за предвремени избори.
Според СДСМ, зад ваквиот развој на настаните стои обид да се дефокусира јавноста од, како што велат, состојбите поврзани со Алта банка и економската состојба во државата.
Во реакцијата, СДСМ оценува дека Владата не испорачала резултати во клучните области, обвинувајќи ја за лоша економска состојба, неуспешна надворешна политика и проблеми поврзани со финансискиот сектор.
Партијата поставува и прашања во врска со средба што, според нивните наводи, Максим Димитриевски ја имал со Александар Вулин, барајќи објаснување за природата на тој состанок и неговата евентуална поврзаност со Алта банка.
„Каква била улогата на Максим Димитриевски во однос на Алта банка и дали имал каква било поврзаност со процесите околу неа?“, прашуваат од СДСМ.
Од партијата тврдат дека Димитриевски се обидува да се претстави како заштитник на државните интереси, додека, според нив, остануваат неодговорени прашањата поврзани со неговите контакти и активности.
