Со гала-концертот „Љубов“ вечерва во Античкиот театар во Охрид свечено ќе биде отворено 66. издание на фестивалот „Охридско лето“. На отворањето ќе настапат светски познатата сопранистка Ермонела Јахо од Албанија и американскиот тенор Чарлс Кастроново, во придружба на Националната опера и балет под диригентската палка на Марко Боеми.
Директорот на фестивалот, Ѓорѓи Цуцковски, истакна дека „Охридско лето“ веќе 66 години претставува мост меѓу културите и еден од најзначајните меѓународни културни настани во регионот. Фестивалот ќе трае 40 дена и ќе понуди околу 50 музички, театарски, балетски и џез-настани со учество на повеќе од 700 уметници од 24 земји. Во програмата годинава се вклучени и одбележувања на 100 години од раѓањето на оперската дива Ана Липша Тофовиќ и 60 години од основањето на Факултетот за музичка уметност во Скопје. Ќе бидат организирани и тематски вечери посветени на повеќе европски држави, како и Вечер на Европската Унија.
Новина во програмата се концертите на џез-музика што ќе се одржат од 13 до 16 август на сцените „Долни Сарај“ и „Света Софија“. Организаторите потсетуваат дека минатогодишното издание беше рекордно по посетеност, со повеќе од 10.000 посетители и публика од над 30 држави.
Фестивалот се одржува под покровителство на претседателката Гордана Сиљановска-Давкова, со поддршка од Министерството за култура и туризам и А1 Македонија како генерален спонзор. Од фестивалот очекуваат и годинава „Охридско лето“ да биде силен промотор на македонската култура и туризам пред домашната и светската јавност.
