Македонскиот ракометен шампион Вардар утревечер од 18:45 часот во СЦ „Јане Сандански“ ќе го пречека францускиот Нант во натпревар од 2. коло во Лигата на шампионите.
По поразот на гостувањето кај германскиот Мелсунген во воведното коло, „црвено-црните“ ќе се обидат пред своите навивачи да стигнат до првите бодови во новата сезона од елитното европско натпреварување.
Сепак, Вардар ќе настапи ослабен, бидејќи сигурно ќе недостигаат Милан Лазаревски и Милан Бомаштар, додека настапот на Жоао Педро ќе зависи од неговата состојба по последниот тренинг.
Тренерот Иван Чупиќ истакна дека Нант е исклучително квалитетен противник, но нагласи дека неговиот тим има јасна цел – да ја искористи поддршката од домашната публика и да дојде до победа.
„За Нант можам да кажам само пофални зборови – и за тренерот и за играчкиот кадар. Сепак, нашата желба е да ги освоиме двата бода и да ја забележиме првата победа сезонава во Лигата на шампионите. Сакаме повторно да ја почувствуваме енергијата од трибините и веруваме дека тоа може да биде нашата предност. Победа би ни донела дополнителна самодоверба пред следните натпревари“, изјави Чупиќ.
Тој потврди дека Лазаревски поради повреда на рамото продолжува со индивидуална работа и нема да биде во составот, додека Бомаштар повторно почувствувал болки во грбот и исто така ќе го пропушти натпреварот.
„Педро е во завршната фаза од рехабилитацијата. По последниот тренинг ќе донесеме конечна одлука. Ако процениме дека не е целосно подготвен, нема да ризикуваме. Сакаме да биде целосно здрав за продолжението од сезоната“, додаде стратегот на Вардар.
Словенечкиот репрезентативец Јака Малус истакна дека настапите во дресот на Вардар во „Јане Сандански“ претставуваат посебен мотив.
„Секој натпревар за Вардар е голема мотивација, а европските мечеви се нешто посебно. Имав можност да играм во оваа сала кога Вардар беше на врвот на Европа, а сега чест ми е што сум дел од овој клуб. Едвај чекам да излеземе на терен и да се бориме за победа пред нашите навивачи“, изјави Малус.
