Пратениците на вториот ден од расправата го изгласаа буџетот за 2026 година, тежок 6,7 милијарди евра. Вкупно гласаа 85 пратеници, од кои 71 гласаа „за“, а 14 „против“.
Расправата во Собранието помина во знакот на жестоки меѓусебни обвинувања меѓу власта и опозицијата. Опозицијата оцени дека буџетот не е ниту развоен ниту социјален, дека има предизборен карактер и дека нема допирни точки со реалната состојба во економијата. Од владејачкото мнозинство, пак, тврдат дека станува збор за европски и развоен буџет, кој ќе донесе силен инвестициски циклус и подобрување на животниот стандард.
„Сега имаме фискална дисциплина, наместо распаднати јавни финансии. Овој буџет е консолидиран, а не напумпан. Воведуваме е-фактура, дигитализација на УЈП и Царината, минимален глобален данок и системски реформи. СДСМ остави хаос, неплатени обврски и буџетски дупки“, изјави пратеникот Јован Јаулески од ВМРО-ДПМНЕ.
Од опозицијата остро возврати пратеникот Благој Митрески од СДСМ, кој оцени дека владата и опозицијата живеат во „различни димензии“. Според него, владините проекции не се засновани на реални бројки и не ја отсликуваат вистинската состојба на економијата.
„Ова ниво и структура на инвестиции е навреда за самиот збор капитални“, додаде Митрески, оценувајќи дека планираните капитални инвестиции се недоволни и нереални.
