Четиригодишно дете минатата година остварило 3,1 милион денари од дивиденда, а 97-годишен пензионер е највозрасниот милионер, кој приходите ги остварил од пензија и други извори, соопшти денеска Управата за јавни приходи (УЈП).
Во текот на 2025 година биле поднесени 863.100 даночни пријави, што претставува зголемување од 10,6 проценти во споредба со претходната година. Најголем број пријави биле поднесени во Скопје, а потоа следуваат Штип, Прилеп, Битола, Тетово и Струмица.
Највисокиот доход во 2025 изнесува 257,5 милиони денари и го остварил граѓанин од Гевгелија преку плата, дивиденда и друг доход исплатен од една компанија. Следува граѓанин од Охрид со 254,4 милиони денари. Овие приходи покажуваат зошто е важно различните извори на доход да се разгледуваат заедно, а не изолирано, рече директорката Елена Петрова на брифинг со новинарите.
