Управа за јавни приходи соопшти дека е во постојана и целосна соработка со надлежните институции во сите случаи каде што постои сомневање за незаконито постапување во даночната сфера. Во врска со актуелниот случај кој опфаќа 11 вработени, од УЈП информираат дека до обвинителството е доставена целокупната потребна документација, материјали и стручни појаснувања поврзани со даночната регулатива и применетите постапки.
Од Управата нагласуваат дека стручните наоди и констатации од извршените контроли претставуваат основа за натамошно постапување на другите надлежни органи.
УЈП потенцира дека нема толеранција за незаконито постапување, злоупотреби или корупција, оценувајќи дека ваквите појави се спротивни на професионалните и етичките стандарди на институцијата. Воедно, се нагласува дека во текот на постапките мора доследно да се почитува принципот на презумција на невиност.
Додека траат институционалните и правните постапки, од УЈП посочуваат дека се преземени навремени мерки за непречено функционирање на институцијата и стабилност на работните процеси во засегнатата организациона единица. Целта, како што наведуваат, е зачувување на континуитетот во работењето, заштита на јавниот интерес и институционалниот интегритет.
Од Управата за јавни приходи додаваат дека остануваат целосно посветени на владеењето на правото, отчетноста и професионалното постапување, како и на соработката со сите надлежни органи за утврдување одговорност таму каде што таа постои, без нарушување на угледот и довербата во институцијата и нејзините вработени.
