Претставата „Ифигенија за ништо“ на Драмски театар Скопје ја однесе главната награда на 22. издание на Интернационалниот фестивал на античка драма – ИФАД „Стоби“ 2025, освојувајќи вкупно три престижни признанија.
Награда за најдобра претстава
Со едногласна одлука, жирито во состав Јордан Витанов, Кристина Атанасова Арсова и Фаик Мефаилоски ја прогласи „Ифигенија за ништо“ за најдобра претстава на фестивалот.
„Претставата се издвојува со силна концептуална визија, која античката трагедија ја претвора во современ политички и егзистенцијален коментар,“ стои во образложението.
„Со минималистички, но прецизен сценски јазик, создава длабоко емотивно и интелектуално искуство што ја поврзува митологијата со реалноста на денешниот човек.“
Награда за најдобра режија – Филип Петковски
Режисерот Филип Петковски е добитник на наградата за режија за својот моќен и визуелно впечатлив пристап.
„Петковски создава универзум во кој трагедијата пулсира меѓу древното и модерното. Неговата режија е суптилна, но интензивна – води кон вистинска катарза,“ се вели во Одлуката.
Награда за најдобра женска улога – Јелена Жугиќ
Првенката на Драмски, Јелена Жугиќ, блесна во улогата на Клитемнестра, носејќи ѝ на претставата трето признание.
„Со моќна енергија и прецизна емоционална контрола, Жугиќ создава потресна и комплексна Клитемнестра – мајка и жена која се бори меѓу љубовта, болката и одмаздата,“ нагласува жирито.
Награда за најдобра машка улога – Марко Трајковиќ
Одделно, жирито го награди Марко Трајковиќ од Кумановски театар за улогата на Калигула во истоимената претстава, за „извонредна психолошка длабочина и интензитет“.
Фестивалот „Стоби“ уште еднаш потврди дека античката драма и понатаму инспирира современи уметнички визии, а младите театарски творци ѝ даваат нов, човечки и силен глас.
Претставата „Ифигенија за ништо“ повторно ќе биде на репертоар на Драмски театар Скопје на 6 ноември, со времетраење од 105 минути.
Претставата не се препорачува за лица под 16 години.