Тешка сообраќајна несреќа се случи ноќеска на магистралниот пат Струмица – Радовиш, во близина на селото Радичево, при што животот го загуби 58-годишен возач од струмичко, а едно лице е повредено. Според Министерството за внатрешни работи, за несреќата е приведен 19-годишен возач кај кого било утврдено присуство на алкохол.
Несреќата била пријавена на 25 октомври околу 02:00 часот. Во судирот учествувале патничко возило „пежо“ со радовишки регистарски ознаки, управувано од Н.В. (19) од селото Злеово, радовишко, и патничко возило „мицубиши“ со струмички регистарски ознаки, управувано од Р.С. (58) од селото Добрејци, струмичко.
Од здобиените повреди, 58-годишниот возач починал на местото на несреќата, а лекар од Итната медицинска помош ја констатирал смртта. Во несреќата телесни повреди добил и сопатникот во „мицубиши“, Д.А. (36) од селото Дабиле.
Увид на местото извршиле јавен обвинител и увидна екипа на СВР Струмица. При извршените проверки било утврдено дека 19-годишниот возач бил под дејство на алкохол, при што му биле измерени 1,32 промили алкохол во крвта. Тој е лишен од слобода.
По наредба на јавен обвинител, телото на починатиот е предадено на обдукција, а надлежните институции продолжуваат со истрагата за целосно утврдување на околностите под кои се случила трагичната сообраќајна несреќа.
