Градоначалникот на Општина Гази Баба, Бобан Стефковски, денеска со особена чест и задоволство им ги додели признанијата и паричните награди на првенците на генерација од општинските основни училишта на територијата на општината.
Тој во објава на Фејсбук истакна дека станува збор за млади луѓе кои со својот труд, посветеност, дисциплина и љубов кон знаењето покажале дека успехот не доаѓа случајно, туку е резултат на континуирана работа и истрајност.
„Токму затоа, нивните постигнувања заслужуваат да бидат препознаени и вреднувани. Особено сум горд на нашите првенци Никола, Теона, Петра, Јасмин, Калина, Деа, Стефан, Ева, Ана, Милијана и Ева, кои денес се пример за своите врсници и вистински амбасадори на знаењето, образованието и младинскиот потенцијал во нашата општина“, наведе Стефковски.
Тој додаде дека нивниот успех е резултат не само на нивната посветеност, туку и на поддршката од родителите, наставниците и училиштата, упатувајќи честитки до сите кои учествувале во нивниот пат до овој успех.
Како градоначалник, Стефковски истакна дека верува оти инвестирањето во младите е најдобрата инвестиција за иднината на Гази Баба, додавајќи дека општината ќе продолжи да ги поддржува учениците со врвни резултати.
„Драги ученици, пред вас се нови предизвици, можности и успеси. Посакувам секогаш да останете посветени на своите цели, да верувате во себе и храбро да чекорите по патот на знаењето. Честитки за заслуженото признание! Вие сте гордост на вашите семејства, училиштата и целата општина Гази Баба“, порача градоначалникот.
