Сојузот на синдикатите на Македонија ќе организира протест в среда, со цел да го искаже незадоволството поради тоа што минималната плата не е зголемена на 600 евра, како и поради барањето за зголемување на сите останати плати за 100 евра.
Протестот ќе започне во 17 часот пред зградата на Сојуз на синдикатите на Македонија, по што учесниците ќе се упатат кон Собрание на Северна Македонија и Стопанска комора на Северна Македонија, а маршот ќе заврши пред Влада на Северна Македонија.
Од ССМ упатија јавен повик до сите работници на кои не им е зголемена платата да се приклучат на протестот, истакнувајќи дека состојбата со животниот стандард е алармантна.
Претседателот на ССМ, Слободан Трендафилов, изјави дека синдикатот е решен да се избори за достоинствени плати и подобар работнички стандард, нагласувајќи дека прагот на сиромаштија во Македонија изнесува 31.200 денари, а околу 33 проценти од вкупно 540 илјади вработени живеат под овој праг.
Трендафилов потсети дека и во анкетите спроведени од ССМ, работниците јасно се изјасниле дека се подготвени да излезат на протест доколку не дојде до зголемување на платите.
Тој најави дека протестот е само прв чекор и дека доколку нема слух од институциите, ќе следуваат дополнителни протести, таргетирани блокади, како и 24-часовен генерален штрајк во јавниот и приватниот сектор. Како можна следна мерка, ССМ најави и собирање 10.000 потписи со цел да се поднесе иницијатива за намалување на функционерските плати за 78 проценти и зголемување на минималната плата на 600 евра.
Според Трендафилов, во изминатата година немало значително зголемување на платите, додека од јануари синдикалната кошничка е поскапена за речиси илјада денари. Тој предупреди дека ваквите политики придонесуваат за иселување на квалификуван кадар со цели семејства, додека работните места сè почесто ги пополнуваат странски работници.
