Премиерот Христијан Мицкоски во Њујорк оствари средба со словенечкиот премиер Јанез Јанша, на која разговарале за европската перспектива на Македонија, продлабочувањето на политичката и економската соработка, како и за актуелните геополитички и безбедносни предизвици во Европа и регионот.
Мицкоски истакна дека Македонија останува цврсто посветена на европската интеграција и реформите, но нагласи дека пристапниот процес треба да се темели на заслуги, исполнети критериуми и реални резултати, без нови билатерални условувања кои, според него, не се поврзани со европските вредности.
„Не бараме привилегии и не бараме пократок пат. Бараме фер и предвидлив процес во кој постигнатото ќе се вреднува, а Македонија ќе биде почитувана како држава и партнер“, порача премиерот во објава на Фејсбук.
Тој ја оцени Словенија како долгогодишен пријател и значаен партнер на Македонија во Европската Унија и НАТО, нагласувајќи дека постои заеднички интерес за понатамошно зајакнување на економската соработка, привлекување нови инвестиции и реализација на конкретни проекти од интерес за двете држави.
Според Мицкоски, Владата ќе продолжи со спроведување на реформите, развој на економијата и зајакнување на меѓународните партнерства, истовремено, како што наведе, достоинствено бранејќи ги македонските национални интереси.
Тој порача дека Македонија ќе продолжи да гради пријателства и нови можности, со цел државата да биде економски посилна и почитуван партнер на меѓународната сцена.
