Претседателката Гордана Сиљановска-Давкова престојува во работна посета на Франција, каде што учествува на деветтото издание на Парискиот мировен форум – меѓународен собир посветен на глобалниот мир, безбедност и мултилатералната соработка.
Во рамки на посетата, претседателката денеска ќе присуствува на свеченото отворање на форумот, кој годинава се одржува под мотото „Здружување на силите за она што е најважно“.
Сиљановска-Давкова ќе се обрати на панел-дискусијата „Одбрана на линијата: Суверенитет во ера на хибридни закани“, на која ќе се разговара за современите безбедносни предизвици, заштитата на државниот суверенитет и справувањето со хибридните закани.
Во рамки на форумот, претседателката ќе присуствува и на свечената вечера што во чест на шефовите на држави и влади – учесници на Парискиот мировен форум, ја организира францускиот претседател Емануел Макрон.
Парискиот мировен форум е основан во 2018 година и претставува глобална платформа за дијалог и размена на идеи за унапредување на мирот, меѓународната соработка и подобрување на глобалното управување.
