СДСМ упати критики до Владата поради, како што велат од партијата, недоволната транспарентност околу најавените големи проекти поврзани со изградба на дата-центри и можноста за отворање рудници за антимон.
Од опозициската партија бараат јавноста да биде информирана за сите детали – кои компании би ги реализирале проектите, какви инвестиции се планираат, колкави ќе бидат трошоците и каква корист ќе има државата од нивната реализација.
Особено внимание СДСМ посветува на проектите за дата-центри, при што предупредуваат дека големата потрошувачка на електрична енергија би можела да има влијание врз енергетскиот систем и идните трошоци за електрична енергија.
Од партијата велат дека граѓаните треба да бидат директно вклучени и во одлуките поврзани со евентуалното отворање рудници за антимон, особено во средините каде што би се реализирале такви проекти.
СДСМ ја обвинува Владата за недостиг на информации околу инвеститорите, локациите и условите под кои би се спроведувале проектите, посочувајќи и на прашањата поврзани со заштитата на животната средина, водоснабдувањето и загадувањето.
„Народот не знае ништо“, велат од СДСМ, додавајќи дека природните ресурси и националните богатства треба да се користат во интерес на граѓаните, а не за приватни интереси.
Од опозициската партија побараа жителите во општините каде што се планираат рударски проекти да имаат можност да одлучуваат преку референдум.
