Од ноќеска на полноќ бензините ќе поевтинат за два денара, додека цената на дизел горивото ќе остане непроменета, соопшти Регулаторна комисија за енергетика. Новите цени ќе важат од 19 декември, од 0:01 часот.
Според одлуката, максималната малопродажна цена на моторниот бензин Еуросупер БС-95 ќе изнесува 71 денар за литар, додека Еуросупер БС-98 ќе се продава по цена од 73 денари за литар. Цената на дизел горивото Еуродизел БС (Д-Е V) останува 66,50 денари за литар, а екстра лесното масло за горење ЕЛ-1 ќе се продава по 65,50 денари за литар. Мазутот М-1 НС ќе има цена од 32,635 денари за килограм.
Малопродажните цени на бензините Еуросупер БС-95 и Еуросупер БС-98 се намалуваат за два денара по литар, додека цените на дизел горивото, екстра лесното масло за домаќинство и мазутот остануваат непроменети.
Од Регулаторната комисија појаснуваат дека станува збор за максимални цени и дека трговците на големо и мало имаат можност да ги формираат цените и на пониско ниво од утврдените.
