Бензините од ноќеска на полноќ поскапуваат за 2,5 денари по литар, додека дизелот ќе биде поскап за два денари, одлучи Регулаторна комисија за енергетика. Со оваа одлука, малопродажните цени на нафтените деривати се зголемуваат во просек за 3,47 отсто.
Според новата одлука, ЕУРОСУПЕР БС-95 ќе се продава по 85 денари за литар, ЕУРОСУПЕР БС-98 по 87 денари, додека цената на ЕУРОДИЗЕЛ БС (Д-Е V) ќе изнесува 93,5 денари. Екстра лесното масло за горење (ЕЛ-1) ќе чини 98,5 денари за литар. Зголемена е и цената на мазутот М-1 НС, која сега ќе изнесува 49,720 денари за килограм.
Од РКЕ посочуваат дека растот на цените е резултат на зголемените референтни цени на светските пазари – кај бензините за 5,324 отсто, дизелот за 2,817 отсто, екстра лесното масло за 3,394 отсто и мазутот за 8,305 отсто. Дополнително, влијание има и курсот на денарот во однос на доларот.
Во пресметката се земени предвид и намалените акцизи – за дизелот за 4 денари по литар и за бензините за 2 денари, како и намалениот ДДВ од 10 отсто за бензините.
И покрај новите максимални цени, на дел од бензинските пумпи дизелот и бензините се продаваат по пониски цени од утврдените од РКЕ.
