Слабости во системските контроли, недоволна размена на податоци меѓу институциите и пропусти во проверките довеле до исплата на социјални права без целосно исполнување на законските услови, покажува ревизијата на Државен завод за ревизија.
Според ревизорскиот извештај, само во текот на 2024 година биле утврдени најмалку 235 корисници кои истовремено користеле пензија и права од социјална заштита, при што биле исплатени околу 14,5 милиони денари, односно приближно 236 илјади евра.
Ревизијата на тема „Исплата на права на парична помош од социјална заштита“ го опфатила периодот од 2022 година до јуни 2025 година и ги анализирала процесите на остварување, исплата и контрола на правата што се реализираат преку Министерството за социјална политика, демографија и млади.
Од ДЗР посочуваат дека системот не е целосно усогласен со законската и подзаконската регулатива, а утврдени се и значајни слабости во нормативната рамка и во механизмите за контрола.
Според наодите, од вкупно исплатените средства кај корисниците кои истовремено користеле пензија и социјална помош, 10,7 милиони денари биле исплатени на 190 корисници на гарантирана минимална помош, 426 илјади денари на пет корисници на траен надоместок и 3,3 милиони денари на 40 корисници на социјална сигурност за стари лица.
Дополнително, ревизорите утврдиле дека 11 лица примале средства без да го исполнуваат законскиот старосен услов, при што биле исплатени уште 3,2 милиони денари или околу 52 илјади евра.
Во извештајот се нотираат и пропусти во работата на центрите за социјална работа, меѓу кои недоволни теренски проверки, неспроведени или задоцнети преиспитувања на правата, како и нецелосна службена документација.
Ревизорите предупредуваат и на недоволна координација со институциите задолжени за размена на податоци, што дополнително го зголемува ризикот од неправилни исплати.
Во 2024 година за социјална заштита биле исплатени над 10 милијарди денари, односно околу 162 милиони евра, што претставува 15 проценти од вкупните расходи на ресорното министерство. Во системот просечно биле опфатени повеќе од 113 илјади корисници на различни права од социјална заштита.
Државниот завод за ревизија препорачува подобрување на законската рамка, поефикасна размена на податоци меѓу институциите и зајакнување на контролите со цел да се намали ризикот од неосновани исплати и да се подобри функционирањето на системот за социјална заштита.
