Само десет гнездечки парови од реткиот вид чапја, познат како голем воден бик (Botaurus stellaris), се регистрирани во државава, а неколку од нив се наоѓаат токму на подрачјето на Дојранско Езеро.
Проценката за гнездечката популација ја даваат еколозите од Македонско еколошко друштво (МЕД), кои се дел од проектот „Заштита на медитеранските влажни зони“, финансиран од Француска агенција за развој. Проектот има за цел подобро познавање на биолошката разновидност на Споменикот на природата Дојранско Езеро и унапредување на управувањето со ова значајно заштитено подрачје.
– Големиот воден бик е крупна, таинствена мочуришна птица од семејството на чапјите, силно поврзана со езера, бари и влажни подрачја со обемни појаси од трска. Има перје во земјени тонови и навика да мирува скриена меѓу трските, така што лесно се претопува со околината и ретко се забележува. Најчесто е активна во зори и самрак, кога тивко се движи низ трската во потрага по риби, водоземци и безрбетници. Забележувањето на големиот воден бик во околината на Дојранското Езеро е посебно природно доживување и јасен знак за зачувани и функционални водни екосистеми, се наведува во објавата на МЕД.
Во рамките на проектот „Заштита и ревитализација на медитеранските влажни зони – PROZHUM“, Македонското еколошко друштво минатата година организираше едукативен камп во Дојран, каде што средношколци од Богданци и Гевгелија преку теренска настава се запознаваа со биодиверзитетот и значењето на заштитата на езерото.
