Полицијата, под раководство на Основното јавно обвинителство за гонење организиран криминал и корупција, спроведе обемна акција против организирана криминална група осомничена за криумчарење стоки, коруптивни кривични дела и нелегална трговија со лекови и суплементи.
Во акцијата, реализирана на 21 септември, полициски службеници од Одделот за сузбивање на организиран и сериозен криминал, во координација со Единицата за брзо распоредување, извршиле претреси на повеќе локации во Скопје, Тетово и Гевгелија.
При акцијата биле приведени шест лица, а при претресите биле пронајдени и одземени повеќе од 100.000 евра во готовина, 16 плочки со златна боја, цигари и тутун без акцизни маркички, голема количина лекови и суплементи за кои постои сомнение дека биле нелегално внесени во државата, како и мобилни телефони и други предмети поврзани со истрагата.
До Основното јавно обвинителство за гонење организиран криминал и корупција е поднесена кривична пријава против осум лица од Тетово, Скопје, Гевгелија и Турција. Тие се осомничени за повеќе кривични дела, меѓу кои криумчарење, прикривање стоки што се предмет на криумчарење, избегнување плаќање акциза, примање и давање поткуп, производство и пуштање во промет штетни средства за лекување, како и перење пари.
Според истрагата, во периодот од 2024 до 2026 година, првоосомничениот организирал мрежа за нелегално внесување, складирање и продажба на акцизна стока, пред сè цигари и тутун. Во криминалната шема, како што наведуваат истражните органи, бил вклучен и царински службеник кој, за примање поткуп, овозможувал непречен премин на стоката преку царинската линија без пријавување и без плаќање на законските давачки.
Во рамки на истите активности нелегално биле внесувани и лекови и суплементи, кои потоа биле продавани без потребните дозволи, упатства и рецепти, со што, според надлежните, било загрозено здравјето на граѓаните.
Истрагата покажала дека со ваквото незаконско работење е предизвикана значителна штета на државниот буџет преку избегнување плаќање царински давачки, акциза и данок на додадена вредност, додека надлежните институции продолжуваат со преземање дополнителни мерки за целосно расчистување на случајот.
