Струга ТЛ продолжува со одличните настапи во Првата македонска фудбалска лига. Тимот од Струга денеска на домашен терен славеше убедлива победа од 6:0 против Арсими во рамки на 8. коло, со што ја запиша петтата победа на својот стадион во исто толку натпревари.
Со новите три бода, составот на Бледи Шкемби остана на само два бода зад лидерот Шкендија и уште еднаш потврди дека сериозно ќе се бори за шампионската титула.
Главен актер на натпреварот беше Марјан Радески, кој постигна хет-трик и ја предводеше офанзивната рапсодија на домашниот тим. Во листата на стрелци се запишаа и Алии, Рочи и Шабани.
Струга ТЛ од самиот почеток ја презеде иницијативата и тргна по рано водство. Малески и Диако први се заканија, а Радески во 14. минута пропушти одлична можност за погодок. Домашните успеаја да ја затресат мрежата преку Бојку, но голот беше поништен поради офсајд по видео проверка.
И покрај неколкуте шанси на Малески, Кола и останатите играчи, на паузата се замина без голови.
Во второто полувреме Струга продолжи со доминацијата, а отпорот на гостите попушти во 62. минута, кога Мислими заработи втор жолт картон и беше исклучен.
Само неколку минути подоцна, во 67. минута, Марјан Радески го отвори резултатот со удар од околу 18 метри, при што голманот на Арсими не успеа да интервенира и топката заврши во мрежата.
За Радески ова беше 30-ти погодок во дресот на Струга ТЛ во најсилната македонска фудбалска конкуренција.
Во 67. минута Радески повторно се најде во центарот на вниманието. По одличниот центаршут на Хамза, со глава зголеми на 2:0 и најави голема победа на домашниот тим.
Само три минути подоцна Алии погоди за 3:0, а потоа следуваше нова фудбалска лекција на Струга. Радески комплетираше хет-трик со погодок за 4:0 по асистенција на Шабани.
До крајот на натпреварот домаќините не застанаа. Рочи, кој влезе од клупата, погоди за 5:0, а Шабани ги постави конечните 6:0.
Струга ТЛ со оваа победа испрати јасна порака дека останува еден од главните фаворити за врвот на табелата и за борбата за шампионскиот трофеј.
