Одлуката на Кристијано Роналдо да стави крај на репрезентативната кариера предизвика бројни реакции ширум светот, а посебно внимание привлече пораката што ја упати неговата сестра Катија Авеиро.
Таа се огласи на Инстаграм откако 41-годишниот фудбалер официјално објави дека повеќе нема да настапува за Португалија, а нејзините зборови предизвикаа дополнителни шпекулации.
„Би можела да кажам многу, но времето сигурно ќе покаже. Ако има уште нешто на што треба да се одговори, можеби утре работите ќе станат појасни. Дотогаш, брате мој, можам да ти кажам само едно: ти си голем, вистински џин и легенда“, напиша Катија.
Токму делот во кој таа наведува дека „има уште нешто на што треба да се одговори“ привлече најголемо внимание, бидејќи дел од јавноста го протолкува како навестување дека зад одлуката на Роналдо можеби стојат дополнителни причини. Сепак, неговата сестра не откри на што конкретно се однесува нејзината порака.
Катија Авеиро во продолжение од објавата истакна дека е горда на целиот пат на својот брат и на придонесот што го дал за португалскиот фудбал.
„Денес светот се простува од тебе во португалската репрезентација. Јас, како твоја сестра, се навраќам на сè низ што си поминал и чувствувам гордост која едвај собира во моето срце. Знам какви битки си водел, колку си ѝ дал на нашата земја и што си изградил во текот на својата кариера“, порача таа.
Таа додаде дека Роналдо успеал да ја промени сопствената судбина, но и да ја поведе Португалија кон големи успеси, нагласувајќи дека секој крај носи можност за ново поглавје.
„Оваа фотографија можеби не е со најдобар квалитет, но за мене има огромна вредност бидејќи чува дел од нашата историја. Ме потсетува дека, пред да станеш Кристијано Роналдо кого целиот свет го обожава, ти беше и засекогаш ќе бидеш мој брат и мое дете. Те сакам и бескрајно се гордеам со тебе“, напиша таа.
Роналдо ја завршува репрезентативната кариера по 23 години настапи за Португалија. Во тој период одигра рекордни 234 натпревари и постигна 146 голови, а со националниот тим ги освои Европското првенство во 2016 година и трофеите во Лигата на нации во 2019 и 2025 година.
