Основното јавно обвинителство Куманово отвори истражна постапка против 40-годишен жител на Кратово, кој е осомничен дека извршил кривично дело „напад врз службено лице при вршење работи на безбедноста“, согласно член 383 став 3 во врска со став 1 од Кривичниот законик.
Според Обвинителството, инцидентот се случил на 11 септември, кога осомничениот нападнал полициски службеници кои преземале службени дејствија за спречување на кривично дело.
Како што се наведува, двајца полицајци употребиле сила за да ја отворат заклучената врата од просторијата во која се наоѓал осомничениот. По влегувањето, тој ги нападнал, при што на еден од полициските службеници со нож му нанел тешки телесни повреди – прободна рана и посекотина.
Јавниот обвинител, имајќи ги предвид околностите на случајот, побарал од судијата на претходна постапка да му биде определена мерка притвор на осомничениот поради опасност од бегство и можност да го повтори кривичното дело.
Постапката за случајот продолжува во надлежност на Основното јавно обвинителство Куманово.
