Во судницата во Основниот кривичен суд продолжи судењето на Стојанче Јовановски обвинет за семејно насилство кое доведе до самоубиство на неговата сопруга Ивана, која со ќерката Катја се фрли од балконот на станот во Тафталиџе, со пуштање на видео снимки како доказ за кривичните дела.
Обвинителството презентираше снимки од безбедносните камери кај гаражата во близина на судовите во Скопје. На снимките се гледа како Стојанче на два пати ја удира Ивана, а во еден момент од силината на ударот и се поместува главата. Полицајците доаѓаат на повик, ги сослушуваат и си заминуваат.
Според обвинителката тие ѝ рекле ако уште еднаш ги повика ќе добие пријава за лажно пријавување. Снимките се направени два часа пред трагичниот чин, на 2 март годинава.
Во судот беше презентирана и снимка од мобилен телефон на која се гледа истепаната Ивана како го прашува насилникот зошто ја удира.