„Пожарот кај Блаце на територија на Чучер Сандево, и покрај интервенциите од воздух, за жал сè уште е надвор од контрола“, само што соопштија од Центарот за управување со кризи (ЦУК).
Од таму информираа дека во текот на денешниот ден, на терен биле со сите расположливи сили и средства — општински служби, физички и правни лица, како и екипи од БППЗ, ДЗС, МВР и ЦУК.
„Сите капацитети се ангажирани, но условите на теренот се исклучително тешки. Голема е вознемиреноста кај населението, бидејќи чадот се проширува низ целата општина и селата Чучер, Мирковци, Глуво, Бразда, сè до Бутел.
Истовремено, регистриран е и нов пожар во атарот на село Кучевиште, кој зафаќа голема површина и се наоѓа во близина на куќи.
Во раните утрински часови беше пружена воздухопловна поддршка со три летала, а попладнето со уште еден воздухоплов. Поради временските услови, се очекува пожарот во текот на ноќта делумно да се стиши, што би овозможило поефикасно дејствување на теренот утре.
За утре е планирано акциите да започнат уште во 5:00 часот, со ангажирање на сите институционални и општински сили на целата зафатена површина, со поддршка од два воздухоплова на МВР. Во вечерните часови, екипите ќе останат на терен и ќе интервенираат согласно приоритетите и потребите“, стои во соопштението на ЦУК
А реагираа и од општина Чучер Сандево. Поради сериозноста на ситуацијата, градоначалникот на Општината, Сашко Комненовиќ, побара од Владата да прогласи вонредна состојба. Оваа одлука е донесена по состанокот на општинскиот кризен штаб.