Партијата на пензионери ја даде својата поддршка за новиот предлог-закон за Кривичниот законик, со кој се предвидува заострување на казните за корупција и криминал поврзан со носители на јавни функции.
Од партијата велат дека злоупотребата на службената положба мора најстрого да се санкционира, но оценуваат дека за законските измени да имаат вистински ефект потребни се дополнителни мерки и темелни реформи во правосудниот систем.
„Како општествено одговорна политичка партија која ги застапува интересите на пензионерите и граѓаните кои со децении чесно го граделе ова општество, сметаме дека злоупотребата на службената положба мора најстрого да се санкционира“, наведуваат од Партијата на пензионери.
Меѓу главните барања што ги предлага партијата е проширена и итна конфискација на имот за кој функционерите не можат да докажат дека е стекнат со легални приходи. Според нив, одземањето треба да се однесува и на имот префрлен на членови на семејството или блиски соработници.
Од Партијата на пензионери бараат и конфискуваните средства задолжително да се насочуваат кон социјалната заштита, здравството и подобрување на животниот стандард на пензионерите и ранливите категории граѓани.
Дополнително, предлагаат доживотна забрана за вршење јавна функција за лицата кои правосилно ќе бидат осудени за коруптивни кривични дела.
Во делот на реформите во правосудството, партијата предлага воведување систем на проверка на интегритетот и имотната состојба на судии и јавни обвинители, односно ветинг, со цел отстранување на корумпираните кадри.
Како клучни чекори ги наведуваат и целосната деполитизација на Судскиот совет, воведување забрзани постапки за предметите поврзани со висока корупција, како и поголема независност на институциите задолжени за борба против организираниот криминал и корупцијата.
Од партијата порачуваат дека граѓаните заслужуваат праведна и стабилна држава во која законите ќе важат еднакво за сите, без оглед на функцијата или политичката припадност.
