Општина Ѓорче Петров денеска го потпиша договорот со Министерството за животна средина и просторно планирање за изработка на основен проект за изградба на нов водоснабдителен систем, во вредност од 1.019.512 денари.
– Оваа инвестиција претставува клучен чекор кон конечно решавање на долгогодишниот проблем со пристапот до чиста и безбедна питка вода. Општина Ѓорче Петров континуирано вложува напори да обезбеди стабилен и одржлив водоснабдителен систем, кој ќе ги задоволи потребите на сите жители, рече градоначалникот Александар Стојкоски.
Со реализацијата на овој проект се очекува стабилно и редовно водоснабдување, безбедна, проверена и питка вода и доволни количини за секојдневните потреби на сите домаќинства.
– Работиме во интерес на граѓаните, со јасна визија: достоинствени услови за живот во сите населени места во нашата општина. Изразуваме благодарност до Владата на Република Македонија и до Министерството за животна средина за поддршката и партнерскиот однос. Ова е уште еден доказ дека кога институциите соработуваат, резултатите се видливи и опипливи, порача Стојкоски и додаде:
-Ова не е само инфраструктурен проект – ова е нов животен стандард. Чекор по чекор, ги решаваме старите проблеми и го градиме урбано и модерно Ѓорче.
