Денес се навршува една година од трагичната смрт на Фросина Кулакова, 22-годишната модна дизајнерка чиј живот беше прекинат во сообраќајна несреќа во Скопје. Таа загина на лице место откако во неа удри автомобил управуван од млад возач, што предизвика силна јавна реакција и барање правда низ целата земја.
Во спомен на Фросина, денеска е објавена емотивната балада „Фросина“. Текстот е напишан од Огнен Неделковски, а музиката и изведбата се дело на Александар Митевски.
Песната не повикува на одмазда, туку на будење на општествената свест и на одговорноста што ја носиме сите, особено кога станува збор за безбедноста и заштитата на младите животи. Таа порака е во сржта на мисијата на Фондацијата „Фросина Кулакова“, која по трагедијата активно работи на подигање на јавната свест и превенција од слични несреќи.
Во објавата на фејсбук-страницата на Дац и Александар стои:
„Слушнете ја ‘Фросина’, балада во спомен на Фросина Кулакова, чија младост згасна на денешен ден 29 јануари минатата година.
Песната е емотивен подарок од авторите Александар Митевски и Огнен Неделковски за семејството Кулакови и Фондацијата ‘Фросина Кулакова’.
Напишана и родена во една доцна ноќ и во еден здив како демо снимка…
‘Фросина’ нека биде спомен, парче светлина, капка утеха, поука за нацијата и лек за душата.
Да ја споделиме пораката, емоцијата и поддршката…“
Песната е објавена во пресрет на донаторската вечер на Фондацијата „Фросина Кулакова“, која ќе се одржи вечерва во 19 часот, со цел Фросина да не биде заборавена.
https://www.facebook.com/reel/211927740549338
