Денешното рочиште за случајот „Онкологија“ во Основниот кривичен суд Скопје е одложено поради здравствени причини на судијката Снежана Марковска.
Од Судот информираа дека продолжението на судскиот процес е презакажано за 25 ноември.
На последното одржано рочиште, на 5 октомври, во фокусот беше вештачењето на Владимир Даниловски, ангажиран од одбраната, кое се однесуваше на терапиите што им биле давани на пациентите на Клиниката за онкологија.
Обвинителството ги оспори неговите наоди и побара дополнително објаснување врз основа на кои официјални медицински протоколи било утврдено дека применуваната терапија била соодветна.
Одбраната на поранешниот директор на Клиниката, Нино Васев, преку адвокатот Боби Спирковски, посочи дека клучно за постапката е да се утврди дали терапијата влијаела врз влошување на здравствената состојба или предвремена смрт кај пациентите, а не само дали биле избрани соодветни лекови.
На обвинителна клупа се поранешниот директор Нино Васев и онколозите Симонида Црвенкова и Драган Јакимовски, кои се товарат за несовесно лекување пациенти. Во текот на постапката, обвинета беше и докторката Мери Пешевска, која ја призна вината и доби две години условна казна затвор.
Според обвинението, во 47 случаи биле применувани несоодветни терапии, со неправилности во дозирањето и без соодветна процена на здравствената состојба на пациентите. Лекарите се товарат за продолжени тешки дела против здравјето на луѓето и несовесно лекување.
Судскиот процес го води судијката Снежана Марковска, а обвинението го застапува јавната обвинителка Марија Ѓоргева од Основното јавно обвинителство Скопје.
