Пет танкери за нафта и еден брод-реморкер се запалиле во водите на Ормуцкиот Теснец, соопшти Корпусот на Иранската револуционерна гарда.
Според нивните информации, голем танкер за нафта се запалил откако удрил во поморска мина додека се обидувал да помине низ забранет пловен пат во јужниот дел на теснецот.
Од Револуционерната гарда наведуваат и дека друг танкер бил зафатен од „силен пожар“ при напуштање на источниот дел од Ормуцкиот Теснец. Реморкерот кој пристигнал за да помогне во гаснењето на пожарот, исто така бил зафатен од огнот.
Подоцна, иранските медиуми објавија дека уште три танкери претрпеле оштетувања и се запалиле по наводен удар во мини.
За овие настани засега нема независна потврда од меѓународни извори. Британската поморска агенција УКМТО соопшти само за еден инцидент во близина на северниот брег на Катар.
Според УКМТО, танкер за нафта бил погоден од „два неидентификувани проектила“, но агенцијата не објави информации за степенот на оштетувањето или за евентуални жртви.
Ормуцкиот Теснец е една од најважните светски поморски рути за транспорт на нафта, преку која поминува значителен дел од глобалната трговија со енергенси.
