Бојан Јовановски, познат како Боки 13, е ослободен од обвиненијата во предметот „Меѓународен сојуз“, откако Апелациониот суд во Скопје ја преиначил првостепената пресуда.
Информацијата ја соопшти неговиот адвокат Сашо Дуковски, кој преку објава на социјалните мрежи ја потврди одлуката и изрази задоволство од исходот на постапката.
„Ете, правдата е спора, но достижна! Апелациониот суд во Скопје денес донесе ослободителна пресуда за Бојан Јовановски во предметот ‘Меѓународен сојуз’. Со тоа ја преиначи првостепената пресуда на Основниот кривичен суд од пет години!“, напиша Дуковски.
Јовановски во октомври 2025 година беше осуден на пет години затвор во повторената постапка за случајот, за кривичните дела измама и перење пари.
Според обвинението, преку проект за изградба на домови за стари лица биле измамени двајца бизнисмени, а дел од средствата што биле наменети за реализација на проектот биле искористени за финансирање на телевизијата „1ТВ“ и за лични потреби.
Со денешната одлука, Апелациониот суд ја укина првостепената осудителна пресуда и донесе ослободителна одлука за Јовановски.
