Регулаторната комисија за енергетика донесе нова одлука за корекција на цените на горивата, со која во просек се намалуваат малопродажните цени на нафтените деривати за 3,84 проценти во однос на претходната одлука донесена на 26 мај 2026 година.
Најголемо намалување има кај дизел горивото и екстра лесното масло за домаќинство, чии цени се намалуваат за 6,50 денари по литар. Од друга страна, бензините ЕУРОСУПЕР БС-95 и ЕУРОСУПЕР БС-98 поскапуваат за 0,50 денари по литар. Намалување има и кај цената на мазутот, која е пониска за 3,238 денари.
Според новата одлука, која стапува во сила од полноќ, максималната цена на ЕУРОСУПЕР БС-95 ќе изнесува 88 денари за литар, додека ЕУРОСУПЕР БС-98 ќе се продава по 90 денари за литар. Цената на дизел горивото ЕУРОДИЗЕЛ БС ќе биде 85,50 денари за литар, а екстра лесното масло за домаќинство ќе чини 87,50 денари. Новата цена на мазутот ќе изнесува 47,906 денари за килограм.
Од Регулаторната комисија посочуваат дека во пресметката е земено предвид и намалувањето на акцизите за два денари.
Причина за корекцијата на цените е падот на референтните цени на нафтените деривати на светските пазари. Во споредба со претходната пресметка, бензините бележат намалување од 10,867 проценти, дизелот од 10,622 проценти, екстра лесното масло од 10,136 проценти, додека цената на мазутот е намалена за 8,238 проценти.
