Новата театарска премиера „Ова е само крајот на светот“, во режија на Теа Беговска, ќе биде изведена на 7 март во Драмскиот театар во Скопје, со почеток во 20 часот.
Претставата е поставена по текст на францускиот драматург Жан-Лик Лагарс, напишан во 1995 година, а преводот и адаптацијата се дело на Беговска. Делото е познато и по филмската верзија на канадскиот режисер Ксавиер Долан, кој во 2016 година со истоимениот филм ја освои наградата Гран при на Канскиот филмски фестивал. Режисерката посочи дека при адаптацијата на сценскиот текст се водела и од филмската интерпретација на ова дело.
Според Беговска, претставата се занимава со темата на премолчувањето и одложувањето на вистината во семејните односи. Таа нагласи дека токму недостатокот на комуникација во семејството може да доведе до сериозни последици, па затоа претставата се обидува на еден полудокументарен начин да ја доближи публиката до интимниот простор на ликовите.
„Идејата беше гледачите да се почувствуваат како да влегуваат во домот на ова семејство и одблиску да ги доживеат нивните односи, конфликтите и премолчените вистини“, рече Беговска.
Во актерската екипа настапуваат Стефан Вујисиќ, Биљана Драгиќевиќ-Пројковска, Александар Степанулески, Сара Климоска и Ања Митиќ.
Сценографијата и костимографијата ги потпишува Надја Василева-Ковачовска од Бугарија, музиката е на Енес Беговски, додека мултимедијалниот дел и видеоматеријалот ги реализираа снимателот Велимир Стојановски, видеооператорот Матеј Трајковски и техничкиот координатор Михаил Узунов.
Актерката Биљана Драгиќевиќ-Пројковска истакна дека претставата прикажува вистински семеен „ролеркостер“, во кој има многу празнини, недоречености и премолчени чувства. Според неа, станува збор за приказна која не се однесува само на едно конкретно семејство, туку на динамиките што постојат во речиси секое семејство.
Ања Митиќ додаде дека работата на претставата била возбудлив процес, особено во делот каде што ликовите не ги изговараат директно своите чувства, туку ги комуницираат преку тишина, погледи и недоискажани мисли.