Општина Бутел во соработка со Град Скопје започна со реализација на значаен инфраструктурен проект кој опфаќа изградба на пешачка патека и чистење и уредување на коритото на реката Серава во населбата Бутел 1. Станува збор за долгогодишно барање на граѓаните, кое по повеќе од две децении конечно влегува во фаза на реализација.
Од локалната самоуправа информираат дека активностите се одвиваат со забрзана динамика и дека проектот има за цел целосно трансформирање на просторот покрај реката во безбедна, уредена и функционална зона за движење и рекреација на граѓаните.
Проектот предвидува изградба на нова пешачка патека во должина од 1.590 метри, која ќе биде опремена со современо јавно осветлување, нови урбани содржини и клупи за одмор. Дополнително, ќе се изврши и хортикултурно уредување на целиот потег, со што просторот ќе добие значително поуреден и естетски подобрен изглед.
Како дел од интервенциите, ќе се спроведе и темелно чистење на коритото на реката Серава, со што се очекува подобрување на еколошката состојба во овој дел од општината, како и зголемување на безбедноста при поголеми врнежи.
Посебен акцент во проектот е ставен и на најмладите, па покрај патеката ќе бидат изградени и нови детски игралишта, кои ќе овозможат дополнителни содржини за рекреација и забава на децата од населбата.
Од Општина Бутел нагласуваат дека овој проект претставува едно од најголемите вложувања во инфраструктурата и јавните простори во последните години, со цел создавање поквалитетни услови за живеење и уредена урбана средина за сите жители.
