Од денеска, 15 ноември, во Македонија официјално стапува на сила обврската за задолжително поседување зимска опрема во возилата. Законската мерка ќе важи до 15 март 2027 година и се однесува на сите возачи што учествуваат во сообраќајот.
Иако Законот дозволува возење со летни гуми доколку во возилото има соодветни синџири за снег, експертите предупредуваат дека тоа не е секогаш најбезбедното решение, особено во услови на ниски температури и влажни коловози.
Главната разлика меѓу летните и зимските гуми не е само во шарата, туку и во материјалот од кој се изработени. Зимските гуми се произведуваат од специјална гумена смеса која останува еластична и при ниски температури, овозможувајќи подобро прилепување на патот и пократок пат на сопирање.
Од друга страна, летните гуми на студено стануваат потврди, што го намалува нивното прилепување и може да го зголеми ризикот од пролизгување, особено на влажни или замрзнати делници.
Според препораките на производителот на гуми „Мишелин“, зимските пневматици покажуваат најдобри перформанси кога температурите ќе се спуштат под седум Целзиусови степени. Оваа вредност не е строга граница, туку практичен показател кога зимските гуми почнуваат да обезбедуваат подобро држење на патот во однос на летните.
Многу возачи погрешно сметаат дека зимските гуми се потребни само кога има снег. Сепак, нивните предности се чувствуваат и на студени, влажни и лизгави коловози, како и во раните утрински часови кога температурата е ниска, а ризикот од губење на контрола врз возилото е значително поголем.
Затоа, иако законските прописи можат да бидат исполнети и со летни гуми и синџири, поставувањето зимски гуми останува најбезбедниот избор за возење во зимски услови и значително придонесува за поголема сигурност на возачите и останатите учесници во сообраќајот.
