Како главен град и најголем урбан центар во државата, Скопје секојдневно се соочува со предизвици поврзани со сообраќајниот метеж, зголемениот број возила, потребата од поефикасен јавен превоз и подобра пешачка и велосипедска инфраструктура. Поради тоа, Планот за одржлива урбана мобилност претставува важен чекор кон долгорочно и системско планирање на развојот на градот.
Ова го истакна Орце Ѓорѓиевски на работилницата посветена на обука и имплементација на планови за одржлива урбана мобилност, на која присуствуваа и Александар Николоски, претставници на Владата, градоначалници и претставници на Светска банка.
Ѓорѓиевски најави дека во периодот што следува Град Скопје ќе пристапи кон изработка на нов Генерален урбанистички план, во кој ќе бидат вклучени современи урбани и сообраќајни решенија, подобро поврзување на градот, намалување на сообраќајните тесни грла, безбедни пешачки зони, велосипедски коридори, зелени површини и услови за развој на модерен јавен превоз.
Како еден од најзначајните инфраструктурни проекти го посочи воведувањето на БРТ-системот, кој треба да придонесе за модернизација на јавниот превоз во Скопје.
Тој нагласи дека паралелно со тоа треба да се поттикнува користењето на велосипедот како секојдневно превозно средство, преку изградба на безбедни велосипедски патеки, поврзани коридори, подобра сигнализација и подигнување на сообраќајната култура.
Според него, град кој го стимулира велосипедскиот сообраќај инвестира во поздрава животна средина, почист воздух, помал сообраќаен метеж и поголема слобода на движење за граѓаните.
Во делот на комуналната инфраструктура, Ѓорѓиевски најави дека покрај возилата што ќе ги добие од Владата, Градот ќе набави уште четири нови возила и две претоварни станици за отпад.
Едната претоварна станица ќе биде поставена во Ѓорче Петров и ќе ги опслужува општините Ѓорче Петров, Карпош и Сарај, додека втората ќе биде лоцирана во Гази Баба.
Според градоначалникот, ова решение значително ќе ја подобри ефикасноста на системот за собирање отпад, бидејќи комуналните возила нема да мора постојано да патуваат до депонијата, туку побрзо ќе се враќаат на терен.
Тој информираше и дека е во тек постапка за набавка на 2.600 нови контејнери, кои се очекува да пристигнат во наредниот месец. Станува збор за една од најголемите набавки на контејнери во Скопје во последните десет години.
