Министерството за здравство информира дека од активирањето на платформата vakcinacija.mk за бесплатна вакцинација против сезонски грип досега се пријавиле 70.185 граѓани.
Според податоците, досега се вакцинирани 6.282 лица од ризичните категории на населението. Имунизацијата се спроведува на 31 вакцинален пункт низ државата, од кои пет се во Скопје – во поликлиниките „Идадија“, „Бит Пазар“ и „Ѓорче Петров“, како и во Центарот за јавно здравје – Скопје и Институтот за јавно здравје.
Бесплатната вакцинација е наменета за лица постари од 65 години, лица со хронични заболувања, здравствени работници, бремени жени, како и за деца на возраст од шест месеци до пет години.
Од Министерството за здравство апелираат граѓаните од ризичните групи навреме да се вакцинираат, со цел да се намали ризикот од потешки форми на сезонски грип и можни компликации.
