Основното јавно обвинителство за гонење организиран криминал и корупција отвори истражна постапка против три лица, кои се сомничат дека во периодот од декември 2019 до март 2021 година ѝ оддавале доверливи службени информации на организираната криминална група „Дуќанџик“ од скопското село Грчец.
Акцијата, координирана од јавен обвинител и реализирана од Одделот за сузбивање организиран и сериозен криминал при МВР, заврши со приведување на тројцата осомничени.
Според обвинителството, тие се гонат за кривичните дела злосторничко здружување и продолжено оддавање службена тајна. Дополнително, првиот и третиот осомничен се товарат и за попречување на правдата, додека првоосомничениот е осомничен и за противправно стекнување и прикривање имот.
Истрагата покажала дека двајца од осомничените, поранешни главни инспектори за имотни деликти и за недозволена трговија со дрога, преку третоосомничениот доставувале доверливи информации до криминалната група. Станувало збор за податоци поврзани со полициски истраги, безбедносни активности, посебни истражни мерки и оперативни акции, за што, според обвинителството, добивале паричен надомест.
Во наредбата за истрага се наведува дека со откривањето на службените информации осомничените сериозно го попречиле работењето на истражните органи и го отежнале обезбедувањето докази во повеќе кривични постапки.
Меѓу случаите опфатени со истрагата се обид за убиство по нарачка од декември 2019 година, убиство извршено во август 2020 година, истрагата со кодно име „Планина“, случај на грабнување од септември 2020 година, како и двојното убиство во Скопје во март 2021 година. Според обвинителството, до криминалната група биле пренесувани информации за осомничени лица, сведоци, обезбедени докази, полициски активности и службеници ангажирани во истрагите.
