На 6 септември 1962 година во Струга започна првото издание на Струшките вечери на поезијата, манифестација која подоцна прерасна во еден од најзначајните меѓународни поетски фестивали. Идејата се родила една година претходно, по литературното читање одржано на 15 јули 1961 година по повод годишнината од објавувањето на Зборникот на браќата Миладиновци.
Во 1962 година бил формиран првиот седумчлен фестивалски одбор, а за негов претседател бил избран истакнатиот македонски поет Ацо Шопов.
Првото издание се состоело од четири поетски вечери со учество на писатели од Македонија, а веќе во 1964 година манифестацијата прераснала во општојугословенски фестивал. Само една година подоцна, во 1965 година, СВП добиле меѓународен карактер со учество на поети од повеќе европски земји.
Во 1966 година била востановена најпрестижната фестивалска награда „Златен венец“, чиј прв добитник бил советскиот поет Роберт Рождественски. Од 1971 година „Златниот венец“ се доделува за целокупниот поетски опус, а меѓу лауреатите се Пабло Неруда, Вистан Хју Оден, Блаже Конески, Ален Гинсберг, Јосиф Бродски, Шејмас Хини и Маргарет Атвуд.
Во 2026 година престижното признание ѝ припадна на холандската поетеса Анеке Брасинга.
Фестивалот ја доделува и наградата „Браќа Миладиновци“ за најдобра поетска книга од македонски автор објавена меѓу две фестивалски изданија. „Мостови на Струга“, пак, под покровителство на УНЕСКО се доделува за најдобра дебитантска поетска книга од автор од светот. Еден од најпрепознатливите симболи на фестивалот е традиционалното поетско читање „Мостови“, кое се одржува на истекот на Црн Дрим од Охридското Езеро.
Од скромните четири поетски вечери во 1962 година до денес, Струшките вечери на поезијата ја претворија Струга во светска престолнина на поезијата и место на средба на различни јазици, култури и литературни традиции.
