Град Скопје ја прифати иницијативата на советничката група на Левица со која се предвидува ослободување на младите брачни парови од плаќање на делот од надоместокот за уредување на градежното земјиште што му припаѓа на Градот, при изградба на нивната прва семејна куќа.
Од Левица информираат дека целта на мерката е да се намали финансискиот товар врз младите семејства и да се олесни пристапот до сопствен дом, во услови на зголемени трошоци за градежно земјиште, материјали, работна сила и административни давачки.
Ослободувањето ќе се однесува само на делот од надоместокот кој претставува приход на Град Скопје, додека средствата што согласно закон му припаѓаат на општината на чија територија се наоѓа градежната парцела остануваат непроменети.
Мерката ќе биде наменета за брачни парови кај кои двајцата сопружници немаат друга станбена недвижност соодветна за домување и кои градат прва семејна куќа за сопствени потреби.
Од Левица оценуваат дека со оваа иницијатива се воведува конкретна локална поддршка за младите семејства и се создаваат услови полесно да го решат станбеното прашање.
