Легендарниот македонски бенд „Мизар“ на 3 април ќе одржи посебен концерт во Македонската филхармонија, најавен како интимна вечер со внимателно избрана „best of“ програма. Настанот ќе биде посветен на богатото музичко наследство на бендот, кој со децении има значајно место во македонската алтернативна сцена.
Публиката ќе има можност да слушне песни од различни периоди од кариерата на „Мизар“. На програмата ќе се најдат композиции од албумите „Мизар“, „Кобна убавина“, „Svjat Dreams“, „Детето и белото море“, „Поглед кон цветната градина“, „Вечна празнина“ и други препознатливи дела од нивниот опус.
Основан во Скопје во почетокот на 80-тите години, „Мизар“ создаде специфичен звук во кој се преплетуваат пост-панк и дарквејв естетика со елементи од македонската духовна и традиционална музика. Токму таа комбинација го изгради нивниот препознатлив стил и култен статус во македонската и регионалната музичка култура.
На сцената ќе им се придружат и гости – музичари кои низ годините биле дел од приказната на „Мизар“ и оставиле свој белег во развојот на бендот.
Во меѓувреме, бендот е актуелен со новата песна „Вардар е Стикс“. Новиот вокал на „Мизар“, Нико Ѓорѓиевски – музичар, композитор и продуцент од Битола со класично музичко образование и долгогодишно искуство во различни музички проекти – е автор на текстот и продуцент на песната. Музиката е на Горазд Чаповски, а аранжманот го работеа Чаповски и Ѓорѓиевски. Со приклучувањето кон „Мизар“, Ѓорѓиевски внесува нова свежина и современа енергија во звукот на бендот.
Влезниците за концертот ќе бидат пуштени во продажба од четврток (5 март) во 10 часот, онлајн преку avalonbooking.mk и во продажната мрежа на karti.com.mk. Цените се 1.200 и 1.500 денари.
