Претседателот на Владата на Северна Македонија, Христијан Мицкоски денеска одговарајќи на новинарско прашање во однос на последниот јавен повик од линијата за 250 милиони евра за развој на општините, изјави дека има над 800 апликации за проекти.
– Токму така, се враќам од еден таков настан којшто го организира Министерството за локална самоуправа. Можам да кажам дека вториот повик има повеќе од 800, мислам дека беа 862 проекта, точно не ме фаќајте за збор. Најголемиот дел се во Министерството за транспорт, околу 600. Нешто повеќе од 120 беа во животна средина, генерално во двата повика се околу 1200 проекти. Тука во Велес, 18 проекти имаме. Ова никогаш не се случило, рече Мицкоски.
Тој рече дека може да има друг проблем, односно дали градежно ќе ги затворат сите тие проекти.
– Знаете, 1200 градилишта кога ќе се додадат на сите оние веќе постојни градилишта, станува проблем за градежната оператива. Ние веќе остваривме еден таков состанок и со Стопанската комора и со Комората на градежници. Правиме гантограм на активности. 20 милијарди денари само за Локалната самоуправа се наменети. Така што оваа поддршка мислам дека е голем мотив и инспирација за општините и за градоначалниците да продолжат да испорачуваат за граѓаните и да го следат примерот на Владата, изјави премиерот.
