Претседателот на ВМРО-ДПМНЕ Христијан Мицкоски во говорот по реизборот се осврна и на успехот на партијата и за пребродениот тежок период, кога пред 8 години го преземал лидерството на партијата. Кажа и дека по конгресот ќе има кадровско освежување и промени во сите структури на партијата – од Извршниот комитет до општинските и месните комитети.
„ВМРО-ДПМНЕ имаше историски најдобар резултат на последните избори. Партијата ја кренавме од една многу тешка состојба во која се наоѓаше кога ја преземав: замрзнат имот, политички прогон, луѓе кои ги апсат поради политички позиции, а не поради тоа што направиле некакви дела, случајот „27 април“ и сите кои настрадаа, долгови и што ли уште не. За да денес бидеме победничка партија, со историски добар резултат на последните локални избори. Без долгови кон никому. И политички противник кој е декласиран,“ рече Мицкоски.
На неговите сопартијци им порача дека во функциите што ги земаат влегуваат со нивната чест и углед.
„И многу е важно по што ќе ве запаметат и како ќе излезете во политиката која морам да признаам дека е една валкана арена на многу нечесни игри. Таквата перцепција ја прават токму оние кои на политиката гледаат како алатка за исполнување на свои лични интереси, а не за напредок и заедничко добро … Ниту една функција во партијата не е од Бога дадена или од дома донесена. Никој функционер не е вечен и мора да има одговорност кон членството и кон самите себе. Не заборавајте од каде почнавте и од каде дојдовте,“ рече лидерот на ВМРО-ДПМНЕ, додавајќи дека заедно постигнале многу за краток период и ги исполнуваат очекувањата на народот.
Мицкоски соопшти дека во наредниот шестмесечен период ќе има реформи и кадровски освежувања во сите структури на партијата: „На ВМРО-ДПМНЕ му е потребна новата генерација што треба да се роди во наредниот четиригодишен мандат. Генерација која ќе изгради од желбата и поривот да се гради татковината, која ќе ја следи и гради стратегијата што ќе обезбеди стабилно и победничко ВМРО-ДПМНЕ и силна иднина за нашата татковина Македонија“.
Тој упати порака, како што рече, „до сите што мислат дека да се биде претседател на ВМРО ДПМНЕ е награда, титула или привилегија“.
„Кој мисли дека претседателот на ВМРО-ДПМНЕ се станува лесно – се излажал. Кој мисли дека функцијата се наследува заради блискост или по случаен пат, со плетење мрежи и со неконзистентност – погрешил. Кој мисли дека довчерашните субјективни заслуги ќе му донесат утрешна награда – не ја разбрал оваа партија,“ рече Мицкоски.
Кажа и дека неговиот наследник ќе биде „човек со ’рбет, со интегритет, со дисциплина и фокус“.
„Ќе биде човек што знае да ја носи тежината на државата. Што знае да издржи. Што знае да прости. Што знае да биде чесен и кога боли и кога сите се откажуваат од него, затоа што во моментот им е така опортуно да прават. Наследникот мора да биде човек што ќе знае дека партијата е поголема од него, а не човек што мисли дека е поголем од партијата, истакна Мицкоски и дека следниот претседател на ВМРО-ДПМНЕ мора да биде човек што ќе може да ја води Македонија – не во 2025 година, туку во 2050 година.
