Владата планира самостојно да ги реализира долгонајавуваните хидроенергетски проекти „Чебрен“ и „Галиште“, со вкупна инвестиција од околу 1,5 милијарди евра. Ова го соопшти премиерот Христијан Мицкоски, посочувајќи дека во тек е изработка на физибилити студија, по неуспешните обиди во изминатите три децении, кога пропаднаа дури 14 тендерски постапки за изградба на двата енергетски капацитети.
Според најавите, проектите треба значително да го зголемат домашното производство на електрична енергија и да придонесат за поголема енергетска независност на државата. Хидроелектраната „Галиште“ е проектирана со инсталирана моќност од 193,5 мегавати и се очекува годишно да произведува над 260 гигават-часови електрична енергија. Заедно со „Чебрен“, ќе овозможи поефикасно искористување на водниот потенцијал на Црна Река.
Мицкоски најави и изградба на гасни когенеративни централи за производство на електрична и топлинска енергија, со можност за приклучување на домаќинствата на новиот систем за снабдување со енергија.
Во меѓувреме, во тек е изградбата на ветерниот парк кај Штип, инвестиција вредна 400 милиони евра, која се смета за најголем проект од обновливи извори на енергија во земјава. Паркот ќе се простира на подрачјето на Штип, Карбинци и Радовиш и ќе обезбедува електрична енергија за околу 100.000 домаќинства.
Премиерот откри и дека се водат разговори за уште еден голем ветерен парк во североисточниот дел на државата. Доколку проектот биде реализиран, инвестицијата би достигнала околу 800 милиони евра и би претставувала значаен нов енергетски капацитет за Македонија.
