35-годишен жител на скопското село Студеничани починал откако, според првичните информации, доживеал струен удар додека користел апарат за миење возило.
Од Министерството за внатрешни работи информираат дека случајот бил пријавен на 16 септември околу 11:40 часот. Настанот се случил во дворот на куќа сопственост на 56-годишниот А.С. во селото Студеничани.
Според пријавата, Х.Б. (35) ја земал вап-машината за да измие возило, при што паднал, најверојатно како последица на струен удар.
На местото пристигнала екипа на Итната медицинска помош, која го пренела повредениот во Комплексот клиники „Мајка Тереза“ во Скопје. И покрај напорите на лекарите, таму била констатирана неговата смрт.
По наредба на јавен обвинител, телото на починатиот е предадено на Институтот за судска медицина, каде ќе биде извршена обдукција за утврдување на точната причина за смртта.
