Присуството на Левица на јавната трибина „Што по 35 години?“ предизвикало реакции кај двете најголеми политички партии, оценија од партијата, обвинувајќи ги СДСМ и ВМРО-ДПМНЕ дека со години функционираат во меѓусебен политички дуопол.
Од Левица велат дека настапите на лидерите на двете партии покажале дека тие не можат да прифатат постоење на политичка опција која, како што наведуваат, не е поврзана со ниту една од нив.
„Толку се навикнати секоја политичка сила да биде нечија, што не можат да прифатат дека Левица е своја и автентична како производ на времето“, наведуваат од партијата.
Според нив, по 35 години политика поделена меѓу две партиски структури, се појавила сила која не бара дозвола или политички легитимитет од старите центри на моќ.
Од Левица додаваат дека немаат политички товар од минатото и дека не се поврзани со корупциски афери, што, според нив, им овозможува независно политичко дејствување.
„Левица настана од непомирливоста со таквиот поредок и од одбивањето бедата и неправдата да се прифатат како судбина. Немаме политички долг што мораме да го вратиме, ниту досие со кое може да ни го стишат гласот“, стои во соопштението.
Партијата порача дека ќе продолжи да настапува како самостоен политички субјект и да ја застапува својата програма без, како што велат, влијание од СДСМ или ВМРО-ДПМНЕ.
