Поранешниот директор на РЕК Битола, заедно со неговиот помошник директор за производство, двајца технички директори, двајца раководители на подружници и раководителот на Рудникот Суводол се осомничени денес од Обвинителството дека заедно со сопственикот на „Марковски Компани“ Борче Марковски и еден негов вработен направиле проневера на буџетот на Комбинатот.
Од Обвинителството дознаваме дека тие се сомничат оти во 2023 година како соизвршители сториле продолжено кривично дело „злоупотреба на службената положба и овластување“, така што не ја извршиле својата службена положба со намера на друг да му прибават корист, а да го оштетат Комбинатот за околу 1,6 милиони евра.
Според Обвинителството, тие спротивно на основниот рударски проект и на потребите на рудникот „Живојно“ организирале и реализирале јавна набавка за дислокација на погонски станици од рудникот „Осломеј“ во ПЕ Рудници – РЕК Битола.
При тоа сопственикот на „Марковски Компани“ и уште едно лице вработено во компанијата, се сомничат дека, иако биле свесни дека работите не се извршени, доставувале фактури врз основа на кои од РЕК Битола незаконито платиле 106.200.000 денари со вклучен ДДВ. Па на таков начин сториле продолжено кривично дело „злоупотреба на постапката за јавен повик и јавно-приватно партнерство“.
Додека пак раководителите од РЕК Битола покрај за „злоупотреба на службена положба“ се сомничат и за уште едно дело „измама во службата“, затоа што иако знаеле дека работите не се извршени, потпишувале записници и извештаи дека договорот е целосно реализиран.
Како што претходно објавивме Финансиската полиција утрово го уапси сопственикот на „Марковски Компани“ и поранешните раководители во битолскиот комбинат.
Според нашите информации, Обвинителството бара од Битолскиот основен суд определување на притвор за сопственикот на фирмата и раководителот од ПЕ „Рудници“ во РЕК Битола.
За другите осмоничени се бараат мерки на претпазливост — одземање на патна исправа и повремено јавување во судот, со тоа што поранешниот директор на РЕК Битола, кој е опфатен со овој скандал, веќе се наоѓа во притвор по друга постапка.
МОЖЕБИ ЌЕ ВЕ ИНТЕРЕСИРА: