Мажот кој синоќа отвори оган на гала-вечерата на дописниците во Белата куќа е идентификуван како Кол Томас Ален, 31-годишен инженер и програмер од јужна Калифорнија, кој до вчера предавал математика и развивал видеоигри, објави Си-Ен-Ен.
Ален живее во Торенс, мирно предградие на Лос Анџелес, а полицијата веднаш по нападот во хотелот „Вашингтон Хилтон“ го идентификуваше како единствен осомничен. Додека агентите го евакуирале Доналд Трамп и останатите гости, во фоајето бил совладан Ален, кој бил тешко вооружен.
Неговиот јавен профил го прикажува како интелигентна и успешна личност. Работел како инструктор во компанијата „Си2 Едукејшн“, каде им помагал на учениците да се подготват за сложени испити. Во декември 2024 година бил прогласен за „учител на месецот“.
Ален дипломирал машинско инженерство на престижниот Калтек, а минатата година стекнал и магистратура по компјутерски науки. Како студент бил познат како иноватор, откако развил систем за итно сопирање на инвалидски колички.
Според достапните податоци, во октомври 2024 година донирал 25 долари за кампањата на демократската кандидатка Камала Харис. Во слободно време се занимавал со програмирање и објавил независна видеоигра на платформата „Стим“.
Иако бил ценет во заедницата, останува нејасно што довело до нападот. Ален моментално е под полициски надзор во болница, а властите најавуваат дека наскоро ќе ги објават сите детали од обвинението против него.