Програмата на годинешното издание на фестивалот „Охридско лето“ продолжува со музичка вечер посветена на пијаното, во рамки на која пред охридската публика ќе настапи познатиот кинески пијанист Сихенг Сонг.
Сонг е роден во Шангај во 1981 година, а се смета за еден од истакнатите пијанисти од својата генерација. Своето музичко образование го стекнувал во Франција, каде што студирал на Високата школа за музика во Париз во класата на Маријан Рубицки. По дипломирањето како концертен пијанист, ги продолжил студиите на Парискиот конзерваториум кај Оливие Гардон, а дополнително се усовршувал и кај Доминик Мерле.
Во текот на кариерата, Сонг освоил награди на повеќе престижни меѓународни пијанистички натпревари, меѓу кои во Мароко, „Висеу“ во Португалија, „Гран при Анимато“, како и натпреварите во Лидс и Даблин. Особено значајно е признанието од 2004 година, кога стана првиот кинески победник на престижниот натпревар „Лонг-Тибо“.
Неговите успеси му овозможиле настапи на голем број сцени низ светот, меѓу кои во Токио, Сеул, Пекинг, Шангај, Париз, Берлин и Њујорк. Бил дел и од реномирани фестивали во Франција, Германија и Полска, меѓу кои „Рок Антерон“, Фестивалот во Рур, фестивалот „Бетовен“ во Бон и фестивалот во Душники.
Како солист, настапувал со бројни оркестри од Франција, но и со Оркестарот од Монте Карло, „Хале“ од Велика Британија, Камерниот оркестар во Виена, Кинеската филхармонија, Филхармонијата на Хонг Конг и Новата јапонска филхармонија.
Сихенг Сонг бил член и на жирија на повеќе меѓународни натпревари, а воедно бил и најмладиот резидентен уметник на Шангајскиот Гранд театар.
Од 2010 година развива и нов концепт на концертни настапи, во кој класичниот рецитал го комбинира со мултимедијални содржини. Досега реализирал пет вакви проекти, поврзувајќи ги музиката и театарот, како и уметноста и литературата, со цел класичната музика да ја доближи до современата публика.
Целовечерниот концерт во рамки на „Охридско лето“ ќе се одржи вечерва во катедралната црква „Света Софија“, со почеток во 21 часот.
На програмата се дела за пијано од Дебиси, Моцарт, Шопен и Чен, како и авторски композиции на самиот Сихенг Сонг.
