Во Македонија за првпат е извршена трансплантација на бубрег од мајка на дете со Алпортов синдром, ретко наследно генетско заболување кое го оштетува бубрежното ткиво и во потешки случаи може да доведе до бубрежна слабост.
По спроведените детални медицински испитувања била утврдена компатибилност меѓу мајката како донор и детето како примател, при што било потврдено дека таа е соодветен жив дарител. Нејзината одлука му овозможи на детето нова можност за живот и претставува значаен чекор во третманот на пациенти со ретки заболувања.
„Ова е пример за најдоброто во нашето здравство – стручност, тимска работа и човечност. Секој трансплантиран бубрег значи нова шанса за живот“, изјави министерот за здравство Сашо Клековски.
Клековски неодамна ги посети пациентите на кои им беа извршени трансплантации на бубрег на Универзитетската клиника за урологија. Кај двајца пациенти бил трансплантиран бубрег од починат дарител, додека кај третиот била извршена трансплантација од жив дарител.
Со овие три интервенции, бројот на трансплантации на бубрег на Клиниката за урологија годинава достигна 15, додека во текот на целата 2025 година биле извршени 11 трансплантации.
Алпортовиот синдром е ретка наследна болест која ги зафаќа бубрезите и може да предизвика нивно постепено откажување, што кај дел од пациентите доведува до потреба од дијализа. Новиот случај покажува дека со навремена дијагностика, прецизна медицинска проценка и соодветна подготовка, трансплантацијата е можна и кај пациенти со ретки генетски заболувања.
„Упатуваме благодарност до семејството за довербата и за согласноста случајот да биде јавно споделен, како и до целиот медицински тим кој деноноќно е вклучен во оваа сложена медицинска постапка“, изјави проф. д-р Билјана Кузмановска, национален координатор за трансплантација.
